Solvi la lingvajn problemojn internacinivele

La 22-an kaj 23-an de Novembro 2024 en Gento, kadre de la Ĝenerala Asembleo de Forumo Junulara Eŭropa – FoJE (anglalingve: European Youth Forum) kuniĝis pli ol sepdek internaciaj junularaj organizoj kaj naciaj junularaj konsilioj, realigis ĝian Ĝeneralan Asembleon kaj aprobis mocion nomatan Pledante por lingva diverseco por plifortigi Eŭropon (anglalingve: Advocating for linguistic diversity to make Europe stronger), en kiu TEJO fizike partoprenis per la TEJO-reprezentantoj Inès Kahin kaj David Ruíz Sánchez.

Pri tiu ĉi mocio, prezentita de la Nacia Junulara Konsilio de Katalunio (Consell Nacional de la Joventut de Catalunya – CNJC) kunverkite kaj kunsubskribe de Tutmonda Esperantista Junulara Organizo, la Nacia Junulara Konsilio de Hispanio (Consejo de la Juventud de España – CJE) kaj Junularo por Eŭropaj Naciecoj (Youth of European Nationalities – YEN), direndas ke la civitanecaj intencoj kaj emoj inkluzivas: Solvi la lingvajn problemojn internacinivele.

La mocio rimarkigas la lingvan diversecon de Eŭropo, enhavanta pli ol 200 lingvojn el pli ol 5 lingvaj familioj, montrante la gravecon protekti ĝin por defendi la kulturan diversecon kaj identecon, kernan por eŭropa inkluziveco. Ankaŭ, oni rimarkigas la defiojn el politikaj kaj administraj vidpunktoj por efektivigi multilingvismon ー pri kaj parolataj lingvoj kaj signataj lingvoj ー en publikaj institucioj.

Aldone, oni pritraktas la agadojn faritajn por la defendado de eŭropaj lingvoj dum la lastaj jaroj el eŭropaj institucioj, montrante la strebojn de organizoj kiel la Konsilio de Eŭropo kaj la Eŭropa Unio, pri kies iniciatoj kiel la Eŭropa Ĉarto por Regionaj kaj Minoritataj Lingvoj (anglalingve: European Charter for Regional or Minority Languages) aŭ la Programo por Kreiva Eŭropo (anglalingve: Creative Europe programme) oni antaŭenigas sukcesajn plibonigaĵojn. Tiel, pere de tiu ĉi mocio, celas defendi la eŭropajn lingvojn instigante el kaj al FoJE:

• Membro-Ŝtatoj de Konsilio de Eŭropo subskribu kaj ratifu la Eŭropan Ĉarton por Regionaj kaj Minoritataj Lingvoj kaj ne kontraŭu proponojn pri aliĝo de laborlingvoj en eŭropaj institucioj;
• Ebligante kaj antaŭenigante plian lingvan diversecon al eŭropaj institucioj en siaj internaj laborlingvoj kaj garantiante lingvajn rajtojn akceptante lingvojn proponitajn de membroŝtatoj, investante pli da rimedoj en produktado de materialoj kiuj faciligas lingvolernadon, protektante kaj subtenante ĉiujn lingvojn;
• Postuli ke ĝiaj Naciaj Junularaj Konsilioj kaj Internaciaj Junularaj Organizoj taksu siajn nunajn lingvopolitikojn, pripensante eventualajn efikojn de uzo de lingvoj en siaj aktivaĵoj kaj instigante la uzon de diversaj naciaj lingvoj en sia laboro kiam ajn eblas;
• Konsciigi la eŭropajn civitanojn kaj civilan socion pri la valoro de lingva diverseco kaj kunhavigi tiujn valorojn kun aliaj, ĉar ĉiuj lingvoj devas esti vivaj, same kiel trakti solvojn al lingvaj rajtoj je internacia, nacia, regiona kaj loka niveloj.

Krome, la mocio ankaŭ alvokas eŭropajn registarojn, junularajn organizojn kaj civilan socion adopti aktivajn politikojn por protekti ĉiujn lingvojn de Eŭropo, certigante ke neniu lingvo perdiĝos dum ĉi tiu jarcento.

La prezidanto de la CNJC, Ernest Montserrat Malagarriga, komentas: Katalunaj junularaj asocioj detektas, jam en nia Strategia Plano 2022-2024, la bezonon promociigi kaj antaŭenigi la katalunan lingvon kaj lingvan diversecon, kaj ĝuste en tiu ĉi kadro la Nacia Junularkonsilio de Katalunio agas kaj okazigas projektojn. Krome, la debato pri la oficiala statuso de la kataluna en la Eŭropa Unio estis lastatempe malfermita, kaj ni volis kontribui al la atingo de ĉi tiu mejloŝtono. La maniero, kiun ni trovis, estas do prezenti mocion al la Forumo Junulara Eŭropa. Ni volis prilabori ĝian enhavon kunlabore kun aliaj organizoj kiel la CJE, YEN aŭ TEJO. En la kazo de TEJO, ĉar ni scias, ke ili havas singularan aliron por lingva diverseco. Poste, la mocio estis ankaŭ riĉigita per la kontribuo de aliaj internaciaj junularaj organizoj, kiel konsekvenco inkludante la signolingvojn, kaj ni tre fieras pri la rezulto.

Kun 60 voĉoj favoraj, 1 kontraŭa kaj 8 sindetenaj, ĉi tiu propono estas historia postulo, kiu nun havas la eksplicitan subtenon de Forumo Junulara Eŭropa – FoJE, junulara platformo, agnoskita kaj financita kaj de la Konsilio de Eŭropo kaj de la Eŭropa Unio.

Tutmonda Esperantista Junulara Organizo strebadas prezenti kaj antaŭenigi poziciojn kaj iniciatojn favore al lingvopolitikoj interalie, strebante konsciigi pri la lingva problemo en internaciaj rilatoj kaj pri ĝia solvo per Esperanto, agadante por la solvo de lingvaj problemoj en internaciaj rilatoj kaj faciligante internacian komunikadon, tiel helpante la junularon havi aktivan rolon en konstruo de socio daŭripova, inkluziva, internacia, interkompreniĝa kaj rajtrespekta.

Koncernaj dokumentoj:

• La mocio oficiale akceptata, en la angla
• Tradukita versio de la mocio, en Esperanto
• Artikolo de CNJC, en la kataluna
• Strategia Plano 2021 – 2025 de TEJO
• La Lingvopolitikaj Pozicioj de TEJO