La 2-an de Aŭgusto 2024, la mondo memoras unu el la plej tragikaj epizodoj en la historio de Romaoj kaj Sintioj – la Holokaŭsto, aŭ Porajmos kiel ĝi estas konata en la Romaa lingvo (“amasbuĉado”). En tiu ĉi tago, ni memoras la 500,000 Romaoj kaj Sintioj, kiuj estis persekutitaj kaj mortigitaj fare de la Nazia Germanio dum la Dua Mondmilito.
Nokte de la 2-a ĝis la 3-a de Aŭgusto 1944, en la Auschwitz-Birkenau koncentrejo, okazis unu el la plej teruraj eventoj de la Romaa Holokaŭsto. En tiu ĉi nokto, ĉiuj restantaj Romaoj kaj Sintioj – pli ol 4,300 infanoj, virinoj, kaj viroj, estis murditaj en la gasejo. Tiu ĉi tago estas nun simbolo de la teruro kaj senespera situacio, kiun tiuj homoj alfrontis.
Memori kaj honori la viktimojn de la Romaa Holokaŭsto estas esenca ne nur por agnoski ilian suferon, sed ankaŭ por lerni el la historio kaj eviti ke tiaj kruelaĵoj iam ajn ripetiĝu. En la lastaj jaroj, estis kreskanta konscio pri la bezono pli bone dokumenti kaj instrui pri la historio de la Romaoj kaj Sintioj dum la Holokaŭsto.
En 2015, la Eŭropa Parlamento deklaris la 2-an de Aŭgusto kiel la ĉiujara Memor-Tago pri Holokaŭsto de Romaoj. Diversaj eventoj okazos ĉirkaŭ la mondo por marki ĉi tiun memorigan datrevenon. Muzeoj, edukaj institucioj, kaj komunumaj grupoj aranĝos memorceremoniojn, ekspoziciojn kaj diskutojn por rememori la viktimojn kaj eduki la publikon pri ĉi tiu parto de la historio. Ni honore memoras la viktimojn de la Romaa Holokaŭsto kaj ni renovigas nian sindevigon al justeco, toleremo kaj homa digno por ĉiuj.
En ĉi tiu kunteksto, TEJO ludas gravan rolon en antaŭenigo de edukado kaj konscio pri historiaj eventoj kiel la Holokaŭsto. TEJO kunigas junulojn el diversaj partoj de la mondo, utiligante Esperanton kiel ilon por interkultura kompreno kaj solidareco. Ĉiujare, TEJO organizas eventojn kaj seminariojn, kiuj celas edukadon pri homaj rajtoj, kontraŭbatalon de diskriminacio kaj rasismo, kaj memorigon pri historiaj maljustaĵoj.
La 80a datreveno de la Romaa Holokaŭsto estas ŝanco por TEJO kaj aliaj junularaj organizoj elmontri sian engaĝiĝon al ĉi tiuj valoroj. Per edukado kaj aktiva partopreno, junularaj movadoj povas kontribui al la formado de pli justaj kaj toleremaj socioj.
Legu pli pri tiu ĉi tago