Kadre de la Eŭropaj Solidaraj Korpusoj, TEJO (Tutmonda Esperantista Junulara Organizo) invitas vin por iĝi plentempa TEJO-volontulo en la Centra Oficejo en Roterdamo.
Esti volontulo signifas ne nur grave kontribui al la bonfarto de la organizo, sed estas samtempe persona pliriĉiĝo. La volontulo laboras en la koro de la Esperanto-movado – la Centra Oficejo de Universala Esperanto-Asocio kaj TEJO, povas kunlabori pri tre interesaj projektoj (ekz. organizado de aranĝoj, inform-agadoj, kampanjoj aŭ evoluigo de interretaj projektoj), partopreni aranĝojn reprezentante TEJO-n kaj kunlabori en la tutmonda medio.
EVS estas malferma al junaj kandidatoj kies aĝo estas inter 18 kaj 30 jaroj. La projekto limigas la daŭron de la volontulado al maksimume unu jaro, tiel ebligante al multaj akiri tiujn spertojn. Kiel volontulo vi certe lernos memstare labori kaj povas profundigi viajn spertojn, interalie en la sube menciitaj taskoj.
Ekzemploj el viaj estontaj taskoj estas:
- informado pri la agado de TEJO dum esperantaj kaj ne-esperantaj kongresoj kaj seminarioj: prelegado per “TEJO sinprezentas”, deĵorado en TEJO-budo, kunplanado de la movada programo, helpo por okazigi KER-ekzamenojn
- reprezentado de TEJO ĉe internaciaj aranĝoj kaj konferencoj: partopreno en COMEM, UNITED-konferencoj, UNOY-forumoj, EJO & YO!Fest ktp.
- partopreno en diversspecaj kaj diverslingvaj trejnadoj, rete kaj ĉeeste, laŭ viaj interesoj
- prizorgado de kontaktoj kun eŭropaj kaj neeŭropaj strukturoj kaj organizoj
- aktiva kunlaboro en la aktualigo de la retpaĝoj kaj la sociretaj kanaloj de TEJO, inkluzive de kreado de novaj enhavoj kaj tradukado al via denaska lingvo
- aktiva subtenado de la agado de la estraranoj kaj komisiitoj de TEJO en la fakoj, kiujn vi plej ŝatas
- helpado al la organizado de aranĝoj tutmonde kaj surloka volontulado dum aranĝoj elektitaj inter IJK, UK, JES, SES, SemEO, KKPS, IJF, IJS…
- pritraktado de la poŝto (papera kaj reta) de TEJO kaj prizorgado de la arkivoj
- loka agado en Roterdamo, ekzemple kune kun la AEGEE kaj ESN-grupo de la Erasmus Universitato aŭ memstare en CO
- prizorgado de rilatoj kun lokaj instancoj, kiel ekzemple por akirado de vizoj
- kunlaboro en komunikaj projektoj de la organizo, kiel videojn, reklamojn, intervjuojn ktp.
Por pli inspiriĝi, jen ekzemploj de specifaj taskoj plenumitaj de volontuloj pasintece:
- ĉeesto de Trejnado pri Rajtbazita Aliro, organizita de FoJE dum KKPS
- programado de la Centra Reto
- tradukado al Esperanto ĉe Global Voices
- ĉeesto dum EstrarKunsidoj kaj kunplanado de la estonta strategio de la organizo
- plursemajna surloka helpo por okazigi IJK
- volontulado ĉe Global Festival of Action
- filmado de videoj pri la volontula vivo en Roterdamo
La ideala kandidato:
- havu bonan scipovon de Esperanto kaj se ne, montru intereson lerni la lingvon antaŭ aŭ tuj post la komenco de la volontulado
- ŝatu administran laboron farenda per komputilo (bazaj scipovoj pri retpoŝtoj, interreto, tekstprilaborado, kreado de prezentaĵoj ktp.)
- havu sufiĉan konon pri la celoj de la junulara Esperanto-movado
- estu kapabla memstare preni decidojn
- estu kapabla labori en teamo kaj taŭge sinesprimi en grupaj situacioj
- estu preta aktive kunlabori kun la estraro de TEJO rilate al la ĝenerala funkciado de la organizo
- havu konojn pri la eŭropaj junularaj strukturoj kaj eŭropaj instancoj
- neniam antaŭe partoprenis EVS-projekton
Kompreneble, tiuj estas ecoj de la ideala kandidato kaj ni konscias, ke ne facilas ĉiujn ilin plenumi. Krome, inter la elekto kaj komenco de la volontulado estos ankoraŭ sufiĉe da tempo por plibonigi iujn aferojn kaj ankaŭ la taskoj estas interkonsenteblaj. Do ne hezitu kandidatiĝi ankaŭ se vi ne trovas en vi ĉion de ĉi tiu listo!
Vi povas kandidatiĝi ekde nun. Ni regule analizos la kandidatiĝojn ĝis la eltrovo de la taŭgaj homoj.
Vi volontulos dum unu jaro kaj via komencdato estos interkonsentita (eblas ekde junio). Loĝado estos senpaga, aldone al transporto kiu rilatas al la volontulado.
TEJO serĉas minimume tri volontulojn por la volontula periodo, do se vi estas du aŭ tri kandidatoj kaj nur pretus volontuli kune, vi rajtas kaj bonvenas kandidatiĝi specifante tion en la motivletero.
Kiel kandidatiĝi
Kandidatiĝojn sendu retpoŝte al info@tejo.org kun la jenaj dokumentoj enhave, prefere en unu *.zip dosiero kaj sub titolo laŭ la formato “ESC-2019-alvoko-printempo: nomo familia_nomo”:
- vivresumon (priskribantan viajn studojn, kursojn, spertojn movadajn kaj ekstermovadajn, kaj tiel plu)
- motivleteron (priskribantan kial vi volas volontuli por TEJO)
- laŭeble pruvilojn de la supre postulataj kapabloj
- laŭeble rekomendletero(j)n de ekzemple landa Esperanto-organizo
Grave:
Momente TEJO-volontulo devas daŭre labori en la Centra Oficejo en Roterdamo. Civitanoj de Eŭropa Unio kaj Eŭropa Ekonomia Areo povas senprobleme loĝi kaj labori en Nederlando, sed civitanoj el plej multaj aliaj landoj bezonas labor- kaj restadpermeson. Ĉar Nederlando ne disponigas al volontulaj vizojn kiel kelkaj aliaj landoj, kaj ĉar la volontula poŝmono ne sufiĉos por ricevi laborpermeson, TEJO konsideros tion ĉe la elekto de la volontulo kaj laŭbezone klopodos trovi la necesajn solvojn. Se vi havas aldonajn demandojn pri la programo ne hezitu kontakti nin per info@tejo.org