Home > Dokumentoj > Reglamentoj de TEJO

Ĝenerala Reglamento de Tutmonda Esperantista Junulara Organizo

La teksto estas valida ekde la dato de oficiala akcepto de Statuto de TEJO proponata en julio 2016 al la Komitatoj de UEA kaj TEJO.

1. Membroservoj

La aligitaj kaj asociaj membroj ricevas la samajn membroservojn.

2. Komitatanoj

  1. Komitatano kaj kandidato por komitataneco devas esti individua membro de TEJO.
  2. Komitatano estas konsiderata kiel demisiinta, se li aŭ ŝi ne estas individua membro de TEJO tiam, kiam la Komitato kontrolas la konsiston de la ĉefaj organoj laŭ artikolo 8.
  3. Komitatano kiu ne partoprenas 3 sinsekvajn retajn voĉdonojn estas konsiderata kiel demisiinta.
  4. Komitatano kiu nek partoprenas 2 sinsekvajn retajn voĉdonojn nek komitatkunsidon (senanstataŭe) ene de la mandato estas konsi–derata kiel demisiinta.
  5. Salajrata oficisto de TEJO aŭ volontulo kun ĉioentena rekompenco ne rajtas esti Komitatano.

3. Komitatanoj A

  1. Ĉiu landa sekcio rajtas al nombro de komitatanoj A laŭ la jena tabelo:
    Kalkuleblaj membroj Komitatanoj A
    3-100 1
    101-300 2
    301-1000 3
    1000+ 4
  2. Ĉiu faka sekcio, kiu havas almenaŭ 3 kalkuleblajn membrojn, rajtas al 1 komitatano A.
  3. Kalkulebla membro estas membro de la koncerna sekcio, kiu estas ankaŭ membro de TEJO.
  4. Ordinare, komitatano A estas nomumita ĝis la 30-a de aprilo en para jaro kaj oficas ekde la 1-a de junio en tiu jaro ĝis la 31-a de majo en la sekvanta para jaro.
  5. Komitatano A estas por difinita kunveno anstataŭigebla kondiĉe, ke la anstataŭanto estas individua membro de TEJO.

4. Komitatanoj B

  1. Komitatano B estas elektita per sekreta baloto.
  2. La nombro de elekteblaj komitatanoj B estas po 1 por ĉiu komencita cento da individuaj membroj.
  3. Ordinare, komitatano B estas elektita ĝis la 30-a de aprilo en para jaro kaj oficas ekde la 1-a de junio en tiu jaro ĝis la 31-a de majo en la sekvanta para jaro.(6) Komitatano B ne estas por difinita kunveno anstataŭigebla.

5. Komitatano C

  1. Komitatano C estas elektita per sekreta baloto.
  2. La nombro de elekteblaj komitatanoj C estas 1.
  3. Ordinare, komitatano C estas elektita ĝis la 30-a de aprilo en para jaro kaj oficas ekde la 1-a de junio en tiu jaro ĝis la 31-a de majo en la sekvanta para jaro.
  4. Komitatano C ne estas por difinita kunveno anstataŭigebla.

6. Komitatanoj Ĉ

  1. Komitatanoj Ĉ estas elektitaj per sekreta baloto.
  2. La nombro de elekteblaj komitatanoj Ĉ estas kvarono de la suma nombro de la komitatanoj A, B kaj C.
  3. Ordinare, komitatano Ĉ oficas ekde sia elektiĝo ĝis la fino de la oficperiodo de la elektintaj komitatanoj A, B kaj C.
  4. Komitatano Ĉ ne estas por difinita kunveno anstataŭigebla.

7. Estraranoj

  1. Estrarano estas elektita per sekreta baloto.
  2. Por esti elektita al la Estraro, kandidato devas esti ne pli ol 35-jaraĝa la 31an de aŭgusto en la jaro kiam finiĝas la mandato.
  3. Ordinare, estrarano estas elektita okaze de la ĉefa kunveno de la Komitato ĉiun jaron kaj oficas ekde sia elektiĝo ĝis tuj antaŭ la elekto de estraranoj okaze de la ĉefa kunveno de la Komitato en la sekvanta jaro.
  4. Estrarano, kiu ne estas elektita kiel la Prezidanto, la Ĝenerala Sekretario aŭ la Kasisto, povas esti elektita kiel Vicprezidanto. Ĉiu estrarano rajtas esti elektita por maksimume unu ofico kaj ne rajtas esti elektita al la sama ofico dum pli ol du sinsekvaj mandatoj.
  5. Estrarano ne estas por difinita kunveno anstataŭigebla.

8. Kontrolo

La Komitato kontrolas la konsiston de la ĉefaj organoj okaze de ĉiu kunveno de la Komitato.

9. Aktoj

  1. La aktoj de TEJO estas la komitataj reglamentoj kaj rezolucioj kaj la estraraj decidoj.
  2. Akto estas senvalida tiom, kiom ĝi kontraŭas la Statuton aŭ regularon de TEJO aŭ de organizo kiun TEJO sekcias aŭ membras.
  3. Estrara decido estas senvalida tiom, kiom ĝi kontraŭas komitatan reglamenton aŭ rezolucion.
  4. La Komitato ne povas delegi la faradon de komitata reglamento aŭ rezolucio.
  5. La Estraro povas delegi la faradon de estrara decido kaj ankaŭ rajtigi pluan delegadon.
  6. Reguloj por la funkciado aŭ agado de TEJO, suplementaj al ĝia Statuto kaj al Statuto kaj regularoj de UEA, estas fareblaj nur per komitata reglamento.

10. Elpaŝoj

Ĉiu elpaŝo en la nomo de TEJO devas esti bazita sur rajtigo troviĝanta en Statuta aŭ regulara preskribo de TEJO aŭ en akto de TEJO.

Reglamento pri la Internacia Junulara Kongreso

1. Okazigo kaj karaktero

TEJO ĉiujare okazigas sian Internacian Junularan Kongreson (“IJK”), kiu estas manifestacio de la tutmonda esperantista junulara komunumo kaj celas plifortigi la interkomprenon kaj amikecon inter junuloj de ĉiuj landoj.

2. Invito

La kongreson invitas landa sekcio aŭ, se mankas landa sekcio en la kongresa lando, alia Esperanta organizo.

3. Kongresa kontrakto

  1. La kongreso okazas laŭ kontrakto farita de TEJO kun la invitanto.
  2. La kongresa kontrakto devas enhavi la jenajn kondiĉojn:
    1. la kongreson organizos kongresa komitato laŭ buĝeto aprobita de TEJO;
    2. la kongreso respektos la Statuton kaj regularojn de TEJO;
    3. la kongresanoj kontraktos pri sia partopreno kun la invitanto aŭ la kongresa komitato;
    4. la kondiĉoj de la unuopaj kontraktoj de partopreno devos esti aprobitaj de TEJO;
    5. la kongreso pagos al TEJO por la kredito de la ĝenerala spezokonto sumon egalan al 3 procentoj de program-, loĝ- kaj manĝkotizoj;
    6. se la Centra Oficejo administros iun kotizon, ĝi subtrahos makleraĵon de maksimume 5 procentoj;
    7. la eventuala profito de la kongreso apartenos trione al TEJO por la kredito de la ĝenerala spezokonto, trione al TEJO por la kredito de la Rezervo IJK kaj trione al la invitanto;
    8. la eventualan deficiton de la kongreso transprenos:
      1. unuavice la Rezervo IJK (aŭ, se ĝi elĉerpiĝos, la Junulara Fondaĵo), sed nur ĝis la pli malalta el:
        1. dudekono de la sumo de la buĝetitaj kostoj; kaj
        2. triono de la kredita saldo de la Rezervo IJK en la dato de la kongresa kontrakto; kaj
      2. duavice, po duone, la ĝenerala spezokonto de TEJO kaj la invitanto; kaj
    9. la kongresa komitato regule raportos kaj al TEJO pri la evoluo de la kongresaj financoj.

Komitata reglamento

Difinoj

En tiu ĉi Reglamento:

  1. “La Organizo” signifas Tutmondan Esperantistan Junularan Organizon.
  2. “La Regularo” signifas la Regularon pri Tutmonda Esperantista Junulara Organizo.
  3. La terminoj “anstataŭanto”, “Estraro”, “Ĝenerala Sekretario”, “Vicprezidanto”, “Komitato”, “landa sekcio” kaj “faka sekcio” estas uzataj en la sama signifo kiel en la Regularo.
  4. “UEA” signifas Universalan Esperanto-Asocion tian kia ĝi estas difinita de artikolo 2-2 de la Regularo.
  5. “Prezidanto” signifas la Prezidanton de la Organizo. Okaze de la neĉeesto de la Prezidanto, ĝi signifas homon kiu lin aŭ ŝin anstataŭas.
  6. “Unua Vicprezidanto” signifas, el pluraj Vicprezidantoj, tiun kiu estas unua laŭvice, el unu Vicprezidanto la Vicprezidanton.
  7. “Dua Vicprezidanto” signifas, el pluraj Vicprezidantoj, tiun kiu estas dua laŭvice.
  8. “Tria Vicprezidanto” signifas, el tri Vicprezidantoj, tiun kiu estas tria laŭvice.
  9. “Kasisto” signifas la estraranon pri financoj de la Organizo.
  10. “Sesio” signifas ĉiun kunsidon de la Komitato kiu ne estas rompita per prokrasto ĝis posta momento aŭ tago, sed povas esti rompita per mallongaj paŭzoj.
  11. “Kunveno” signifas aron de sesioj, kiuj havas komunajn kunvokon kaj tagordon.
  12. “Kunsidestro” signifas la homon, kiu je iu ajn momento, efektive kaj laŭrajte prezidas sesion.
  13. “Komitatano” signifas iun ajn el la homoj tiel menciitaj en artikolo 3-2 ĝis 6 de la Regularo. Dum ties periodo de ofico, ĝi signifas ankaŭ anstataŭanton de komitatano A.
  14. “Ĝenerala Direktoro” signifas tiun personon de UEA kiu estas same nomita en paragrafo 44 de la Statuto de UEA.
  15. “Patrono” signifas subtenanton de la Organizo tian kia li aŭ ŝi estas difinita de artikolo 2-11 de la Regularo.
  16. “Membro” signifas individuan, asocian aŭ aligitan membron de la Organizo tiajn kiaj ili estas difinitaj de artikolo 2-10 de la Regularo.
  17. “Partopreno” en decido signifas:
    1. En kunveno, ĉeeston de komitatano konfirmitan per subskribo; kaze de anstataŭoj koncerna persono rajtas maksimume tri foje partopreni en la sama decido;
    2. En poŝta voĉdono, ĝustatempan alvenon de koncerna komitata voĉdonilo al la Ĝenerala Sekretario;
    3. En reta voĉdono, retan esprimon de la elekto kadre de la voĉdonsistemo fare de la komitatano.
  18. El pluraj eblecoj:
    1. “Plimulton” havas tiu, kiun elektis pli da partoprenantoj ol elektis iun ajn unuopan alian eblecon;
    2. “Plejmulton” havas tiu, kiun elektas pli ol duono de la partoprenantoj;
    3. “Dutrionan plimulton” havas tiu, kiun elektas pli ol du trionoj de la partoprenantoj.
  19. “Reglamento” signifas tiun ĉi Reglamenton, nome la Komitatan Reglamenton de la Organizo.
  20. “Reglamentoj” signifas ĉiujn reglamentojn de la Organizo, tiajn kiaj ili estas difinitaj de artikolo 3-7 de la Regularo, konsideratajn ara unuo.
  21. “Sindeteni” signifas ne voĉdoni.
  22. “Sendi” signifas irigi tiel, ke laŭ supozo de la sendinto, la sendaĵo alvenos ĉe sia celo ne pli ol 15 tagojn poste.
  23. “Kotizinta” signifas, ke la koncerna homo pagis sian kotizon al la Centra Oficejo.

Kompetenteco

  1. La Komitato estas la supera instanco de la Organizo. Ĝi:
    1. difinas la ĝeneralan agadon de la Organizo;
    2. elektas estraranojn kaj rajtas eksigi ilin;
    3. decidas pri la agado de la Estraro;
    4. aprobas la buĝeton kaj ekzamenas la financojn de la Organizo;
    5. decidas pri akcepto kaj eksigo de Landaj kaj Fakaj Sekcioj;
    6. decidas pri akcepto kaj eksigo de Honoraj Prezidantoj kaj de Honoraj Membroj;
    7. decidas pri eksigo de Patronoj;
    8. decidas pri reglamentoj;
    9. decidas pri aliaj aferoj ne rezervitaj al aliaj organoj aŭ instancoj.
  2. La Komitato ankaŭ povas decidi pri ĉiuj aferoj, pri kiuj kompetentas la Estraro aŭ unuopa estrarano; komitata decido tiam nuligas kontraŭan estraran aŭ estraranan decidon.

Komitato kaj anstataŭantoj

  1. Ĉiu landa kaj faka sekcio devas nomumi sia(j)n komitatano(j)n A skribe al la Ĝenerala Sekretario. Plej malfrue kun sia nomumo, landa aŭ faka sekcio devas skribe informi la Ĝeneralan Sekretarion pri kiom ĝi pagis al la Organizo pro sia kotizo priskribita de artikolo 2-10(3) de la Regularo. Se landa aŭ faka sekcio pagis tiun kotizon pere de Landa Asocio de UEA aŭ de alia organizo, aŭ se tiun kotizon ricevis UEA, tion devas skribe konfirmi la Landa Asocio aŭ alia organizo aŭ, respektive, UEA, plej malfrue kun tiu nomumo. Nomumo estas nevalida se la Ĝenerala Sekretario ne ricevas tian konfirmon.
  2. Landa Sekcio aŭ Faka Sekcio rajtas malnomumi (eksigi) komitatanon A nomumante alian komitatanon A skribe al la Ĝenerala Sekretario.
  3. Nomumo de anstataŭanto de komitatano A devas esti farita skribe al la Ĝenerala Sekretario, kaj devas esti skribe aprobita de la koncerna komitatano A kaj de la koncerna Landa aŭ Faka Sekcio.
  4. La Ĝenerala Sekretario devas ricevi nomumon de anstataŭanto plej malfrue dum la unua sesio de la kunveno.
  5. Ĉiu komitatano A povas nomumi nur unu anstataŭanton por ĉiu kunveno. Se la anstataŭanto jam estas komitatano aŭ anstataŭanto, li aŭ ŝi ekhavas aldonan voĉon. Dum la koncerna kunveno la anstataŭata komitatano havas neniujn komitatajn rajtojn.
  6. Estraranoj ne rajtas esti anstataŭantoj.
  7. Kunsidestro ne rajtas esti anstataŭanto.
  8. Neniu komitatano rajtas esti anstataŭanto de du aŭ pliaj komitatanoj.
  9. Neniu rajtas esti anstataŭanto de tri ol pliaj komitatanoj.

Reta voĉdono

  1. Ĉiu komitatano rajtas postuli retan voĉdonon pri iu ajn decidota punkto. Se la Komitato estas kunvenanta, reta voĉdono okazas se la Komitato akceptas la postulon. Se la Komitato ne estas kunvenanta, reta voĉdono aŭtomate okazas.
  2. Se du komitatanoj postulas sekretan voĉdonon, tiam la balotado okazu laŭ sekreta reta voĉdono.
  3. Gvidas retan voĉdonadon la Ĝenerala Sekretario.
  4. La Komitato povas laŭ bezono per decido ŝanĝi la teknologion uzatan por retaj voĉdonoj.
  5. La proceduro komenciĝas per la ricevo de la propono far la Ĝenerala Sekretario. Plej malfrue unu semajnon post la ricevo de la propono, la Ĝenerala Sekretario ekigas la balotadon per reta informo al la komitatanoj.
  6. La balotado daŭras 14 tagojn. La Estraro anoncu la rezulton plej malfrue 3 tagojn post la fino de la balotado.
  7. Reta voĉdono estas kvoruma se almenaŭ duono de la komitato voĉdonas. Sindetenoj ankaŭ estas voĉdonoj.
  8. Se plejmulto de la partoprenantoj ne sindetenas, tiu el la poro kaj la kontraŭo kiu havas la plimulton venkas. Okaze de egaleco decidas la Prezidanto. Se simpla plejmulto de la voĉdonantoj sindetenas, oni konsideras tion decido ne voĉdoni retpoŝte pri tiu propono.

Okazo kaj kunvoco de kunveno

  1. Ordinara komitatkunveno okazas unu fojon jare; krome, eksterordinaraj komitatkunvenoj okazas laŭnecese.
  2. Ordinara kunveno okazas dum, kaj en la kadro de, la Internacia Junulara Kongreso (IJK). Se la kunvokanto opinias tion utila, ĝi povas komenciĝi maksimume tri tagojn antaŭ la IJK aŭ finiĝi tri tagojn post la IJK.
  3. Kunvokas ordinaran kunvenon la Ĝenerala Sekretario, kiu sendas skriban inviton al ĉiu homo nomumita kiel komitatano por la koncerna oficperiodo, ĉiu anstataŭanto kaj al la Ĝenerala Direktoro, kaj kopie al ĉiu landa kaj faka sekcio almenaŭ 30 tagojn antaŭ la komenco de la kunveno. Kun la invito estas sendata la tiam valida teksto de la Regularo kaj de la reglamentoj.
  4. Eksterordinara kunveno okazas kiam tion postulas aŭ la Estraro, aŭ kvinono de la komitatanoj, aŭ la Estraro de UEA se ĉi tiu opinias ke la Estraro de la Organizo ne funkcias kaj ke tiu nefunkciado devas esti urĝe traktata.
  5. Kunvokas eksterordinaran kunvenon aŭ la Ĝenerala Sekretario aŭ la instanco kiu postulas ĝin. La kunveno devas okazi en urbo, elektita de la kunvokanto, kie estas oficejo de la Organizo/UEA, aŭ en internacia Esperanto-renkontiĝo tiucele aprobita de la Estraro de TEJO. La kunvokanto sendas skriban inviton al ĉiu komitatano, ĉiu anstataŭanto kaj al la Ĝenerala Direktoro kaj kopie al ĉiu landa kaj faka sekcio, almenaŭ 50, sed ne pli ol 80, tagojn antaŭ la komenco de la kunveno. La invito informas pri la loko, tago kaj horo de la unua sesio de la kunveno, kaj enhavas proponon pri la tagordo.

Partopreno en kunveno

  1. Ĉiu komitatano povas ĉeesti, paroli kaj voĉdoni en ĉiu kunveno de la Komitato.
  2. Ĉiu membro, Honora Membro, Honora Prezidanto, Patrono, komisionano kaj komisiito de la Organizo povas ĉeesti kaj paroli en ĉiu kunveno de la Komitato. La Komitato povas tamen decidi ke iu(j) aŭ ĉiuj el ĉi tiuj ne povas paroli.
  3. Ĉiu homo ne jam aludita povas ĉeesti, sed ne povas paroli, dum ĉiu kunveno, se la Komitato ne decidas kontraŭ ties ĉeesto. La Komitato tamen povas decidi ke iu(j) aŭ ĉiuj el tiuj ĉi povas paroli.
  4. La artikoloj 3.5, 13.2 kaj 15.3 de la Reglamento ne kontraŭas tiun ĉi paragrafon.

Dumkunvenaj labororganoj

  1. La dumkunvenaj labororganoj de la Komitato estas la Propona Komisiono kaj la Voĉdona Komisiono. Ĉiu labororgano havas almenaŭ du membrojn.
  2. Por ĉiu labororgano la Estraro aŭ la kunvokinto proponas liston de membroj, kiun la Komitato eventuale modifas ĝis ĝi akceptas la proponon.
  3. La Propona Komisiono laŭpete helpas komitatanojn pretigi proponojn por la Komitato. Antaŭ la elektoj ĝi ankaŭ prezentas al la Komitato la nomojn de ĉiuj kandidatoj. La Komisiono povas rekomendi kandidatojn kiuj, laŭ la takso de la Komisiono, bone plenumus la respondecojn de la koncernaj oficoj se ili estus elektitaj. Membroj de la Komisiono ne kandidatas.
  4. La Voĉdona Komisiono kontrolas la komitatanecon de ĉiu homo, kiu deziras partopreni la kunvenon kiel komitatano, kontrolas la kvorumon kaj laŭnecese nombras voĉojn dum la kunveno kaj raportas al la Komitato. Membroj de la Komisiono ne kandidatas.

Kvorumo

  1. Kunveno estas kvoruma kaj decidopova kiam ĝin partoprenas almenaŭ triono de la komitatanoj.
  2. Kvorumon en kunveno kontrolas la Ĝenerala Sekretario kaj, post la starigo, la Voĉdona Komisiono.

Tagordo

  1. Proponojn pri tagorderoj oni sendas al la kunvokanto plejmalfrue 15 tagojn antaŭ la komenco de la kunveno.
  2. La kunvokanto kompilas por la kunveno tagordproponon kiu enhavas ĉiun proponitan eron kaj krome la jenajn devigajn erojn:
    1. Malfermo
    2. Eventuala elekto de kunsidestro
    3. Proponoj pri:
      • Voĉdona Komisiono
      • Mandata Komisiono
      • Propona Komisiono
    4. Fikso de cetera tagordo
  3. La tagordproponon estas prezentita al la kunveno je la malfermo, kaj la kunveno laboras laŭ ĝi ĝis inkluzive ero 4.
  4. La kunveno tiam amendas la tagordproponon eventuale aldonante, modifante aŭ nuligante erojn ĝis la akcepto de la tuta propono.
  5. Post tiu akcepto eblas amendi la tagordon nur per dutriona plejmulto.

Prezidado kaj protokolado

  1. La Komitaton prezidas Kunsidestro elektata de la Komitato mem. Ordinare la Estraro proponas unu aŭ pli da eblaj kunsidestroj plejmalfrue unu monaton antaŭ la Komitatkunsido kaj la Komitato elektas per reta voĉdono. Prefere la Kunsidestro ne estu Komitatano.
  2. Respondecas pri la protokolado de la kunveno de la Komitato la Ĝenerala Sekretario. La Ĝenerala Sekretario povas laŭbezone nomumi protokolantojn.
  3. La Ĝenerala Sekretario sendas unu kopion de la protokolo al ĉiu komitatano, anstataŭanto, landa kaj faka sekcio, ene de 30 tagoj.
  4. La protokolo ekvalidas 15 tagojn post ĝia dissendo se en tiu periodo neniu ĉeestinta komitatano aŭ anstataŭanto postulas retan voĉdonon, proponante specifan ĝustigon. La valida protokolo estas la unusola aŭtoritata dokumento pri la kunveno.

Proceduro

  1. Post akcepto de la tagordo, la Komitato traktas ĉiun tagorderon laŭvice, sub gvido de la Kunsidestro.
  2. Ekparoli oni povas nur post permeso de la Kunsidestro, kiu ankaŭ povas fari liston de la parolantoj. La Komitato povas laŭbezone decidi pri limigo de la paroldaŭro de ĉiu parolanto dum la trakto de difinita tagordero.
  3. Se ne prezentiĝis specifa propono pri iu tagordero, komitatano povas paroli ĝenerale pri tiu tagordero, aŭ povas prezenti specifan proponon rilate ĝin.
  4. Se prezentiĝis specifa propono pri iu tagordero, komitatano povas paroli pri tiu propono aŭ povas proponi amendi ĝin.
  5. Kiam neniu komitatano deziras plu paroli pri iu propono aŭ amendo-propono, la Kunsidestro fermas la diskutadon pri tiu, kaj voĉdonigas la Komitaton.
  6. Malgraŭ la ceteraj artikoloj de paragrafo 11 de la Reglamento, komitatano rajtas fari unu el la jenaj proceduraj proponoj (kiuj estas tiuj voĉdonendaj sen diskuto) kiam ajn dum la konsido, akirinte parolpermeson de la Kunsidestro:
    1. Tuj voĉdoni pri la propono diskutata;
    2. Tuj voĉdoni pri la amend-propono diskutata;
    3. Paŭzi dum dek minutoj;
    4. Fermi la diskutadon sen voĉdono kaj ektrakti la venontan tagorderon;
    5. Okazigi retan voĉdonon laŭ paragrafo 5 de la Reglamento.

Voĉdono en kunveno

  1. Post fermo de la diskuto pri iu propono aŭ amendo- propono, oni voĉdonas pri tiu.
  2. Gvidas la voĉdonon la Kunsidestro. Krom laŭ la proceduro priskribita en artikolo 13.4 de la Reglamento, la Prezidanto de la Komitato ne rajtas voĉdoni.
  3. Pri ĉiu propono partoprenanto aŭ voĉdonas aŭ sindetenas. La Voĉdona Komisiono nombras kiom da partoprenantoj voĉdonas por, kaj kiom voĉdonas kontraŭ. La protokolanto kalkulas kiom da partoprenantoj sindetenas.
  4. Se plejmulto de la partoprenantoj ne sindetenas, tiu el la poro kaj la kontraŭo kiu havas la plimulton venkas. Okaze de egaleco, decidas la Kunsidestro.
  5. Se plejmulto de la partoprenantoj sindetenas:
    1. Se temas pri la unua voĉdono pri tiu propono, aŭ pri decido nepre farenda pro priskribo de la Regularo aŭ Reglamento oni remalfermas la diskuton pri tiu propono kaj, kiam tiu dia diskuto estas finita, voĉdonas duan fojon.
    2. Se ne temas pri la unua voĉdono de la Komitato pri tiu propono, oni konsideras tion decido ne voĉdoni pri tiu propono.
  6. Krom laŭ la proceduro priskribita en artikolo 13.5 de la Reglamento, oni voĉdonas nur unu fojon pri iu propono dum unu kunveno.
  7. En paragrafo 13 de la Reglamento, “propono” signifas ankaŭ amendo-proponojn.

Sekreta voĉdono

  1. Ĉiu voĉdono pri elekto de estrarano, komitatanoj Ĉ, komisiitoj kaj komitatanoj A de UEA por la Organizo (sed ne membroj de la labororganoj) estas farita sekrete laŭ la proceduro priskribita en paragrafo 13 de la Reglamento.
  2. Sektreta voĉdono okazas ankaŭ por decido pri regularŝanĝo, Honora Membro, Honora Prezidanto, akcepto aŭ eksigo de landa aŭ faka sekcio kaj krome kiam ajn du komitatanoj tion postulas. Tiam sekreta voĉdodno okazas laŭ la proceduro priskribita en paragrafo 13 de la Reglamento.
  3. Okaze de sekreta voĉdono, gvidas la voĉdonadon kaj nombras la voĉojn la Voĉdona Komisiono.

Elektoj

  1. Ĉiu elekto por la oficoj menciitaj en artikolo 14.1 de la Reglamento okazas laŭ la proceduro priskribita en paragrafo 15 de la Reglamento.
  2. Gvidas la voĉdonadon kaj nombras la voĉojn la Voĉdona Komisiono.
  3. Krom laŭ la proceduro priskribita en artikoloj 15.7.4 kaj 15.8.4 de la Reglamento, la Kunsidestro ne rajtas voĉdoni.
  4. La tenantoj de la oficoj en la Estraro de TEJO, nome la Prezidanto, la Vicprezidanto(j), la Ĝenerala Sekretario kaj la Kasisto, devas esti elektitaj al specifa ofico. Tio signifas, ke devas okazi aparta elekto por ĉiu el tiuj oficoj. Oni voĉdonas unue por la Prezidanto, due por la Vicprezidanto(j), trie por la Ĝenerala Sekretario kaj kvare por la Kasisto.
  5. Kiam la nombro de elekteblaj kandidatoj ne estas priskribita de la Regularo, la Komitato devas unue decidi kiom da ofico-tenantoj ĝi maksimume elektos, antaŭ ol ĝi elektas. Pro la proceduro priskribita en artikolo 15.7 de la Reglamento, povas esti elektitaj malpli da ofico-tenantoj ol la maksimumo decidita de la Komitato, sed ne povas esti elektitaj pli da ofico-tenantoj ol tiu maksimumo.
  6. En artikoloj 15.7 kaj 15.8 de la Reglamento la simbolo “m” signifas la maksimuman nombron de elekteblaj kandidatoj, kaj la simbolo “2m” signifas duoblon de la maksimuma nombro de elekteblaj kandidatoj.
  7. Se ne estas pli ol “2m” kandidatoj:
    1. Oni faras balotilon kun la nomo de ĉiu kandidato, ordigita laŭ la ĉefa nomo skribita nacilingve per latinajliteroj.
    2. Partoprenantoj voĉdonas por kandidato metante ikson apud ties nomo, Ĝis maksimumo de “m” kandidatoj. Oni neaparte indikas tiujn kandidatojn, kiujn oni ne elektis. Estas nevalidaj tiuj balotiloj kiuj havas pli ol “m” iksoj.
    3. Estas konsiderataj elektitaj tiuj “m” kandidatoj kiuj havas plej multe da voĉoj, kondiĉe ke ili ankaŭ ricevis porajn voĉojn de almenaŭ plejmulto de la validaj balotiloj.
    4. Okaze de egaleco inter kandidatoj, decidas la Kunsidestro.
    5. Kaze ke post la baloto ne estus elektitaj sufiĉe da homoj por plenigi la postenojn difinitajn en la artikolo 2.12.3 de la Regularo, oni remalfermas kandidatiĝojn surloke por la vakantaj oficoj. Oni denove voĉdonu laŭ la proceduro priskribita en la artikolo 15.7 aŭ 15.8, depende de la nombro de la novaj kandidatoj.
    6. Post dua sinsekva baloto laŭ la artikolo 15.7.5 sen sukcesa elekto de homo(j) por ofico(j), oni sekvu proceduron laŭ la artikolo 15.9 de la Komitata Reglamento.
  8. Se estas pli ol “2m” da kandidatoj:
    1. Oni faras balotilon kun la nomo de ĉiu kandidato, ordigita alfabete laŭ la ĉefa nomo skribita nacilingve per latinaj literoj.
    2. Partoprenantoj voĉdonas por kandidato metante ikson apud ties nomo, ĝis maksimumo de “2m” kandidatoj. Oni ne aparte indikas tiujn kandidatojn, kiujn oni ne volas elekti. Estas nevalidaj tiuj balotiloj kiuj havas pli ol “2m” iksojn.
    3. Tiuj “2m” kandidatoj kiuj havas plej da voĉoj iras al dua voĉdono, organizita laŭ la proceduro priskribita en artikolo 15.7 de la Reglamento.
    4. Okaze de egaleco de voĉoj inter kandidatoj, decidas la Kunsidestro.
  9. Se ne sukcesis du sinsekvaj balotoj laŭ la artikolo 15.7:
    1. Oni okazigas voĉdonadon en kiu la Komitato rajtas voĉdoni por iu ajn Individua Membro de TEJO;
    2. Estas validaj voĉdonoj kie la nomo estas skribita nekomplete, esperantige, uze de kromnomo, kun nekutima latinliterigo aŭ ortografia eraro, kondiĉe ke tutkonsente laŭ la Voĉdona Komisiono la volo de la elektanto estas klara preter ĉiu nepreteksta dubo kaj ne estas risko de konfuzo kun alia membro de TEJO;
    3. Tiuj “2m” kandidatoj kiuj havas plej multe da voĉoj iras al la dua voĉdono, organizita laŭ la proceduro priskribita en la artikolo 15.7 de la Komitata Reglamento.
    4. Okaze de egaleco de voĉoj inter kandidatoj, decidas la estraranoj kiuj ĉeestas, krom la Kunsidestro. Se denove estas egaleco de voĉoj, decidas Kunsidestro.
    5. Elektita kandidato kiu ne mem kandidatiĝis devas esti tuj kontaktita persone, telefone aŭ rete de la Kunsidestro por peti lian akcepton de la ofico.
    6. Kaze ke la elektito malakceptas aŭ dum akceptebla tempokvanto la Kunsidestro ne sukcesas kontaktiĝi kun li, la Komitato komencas novan baloton laŭ la sama proceduro. La eblo akcepti la postenon ĉesas kiam alia elektita kandidato akceptas ĝin.

Komisionoj

  1. La Estraro povas starigi komisionon por labori pri iu agadkampo de TEJO.
  2. Ĉiu komisiono havas respondeculon ene de la Estraro.
  3. Ĉiun komisionon kunordigas komisiito elektata de la Estraro. La Komitato povas, laŭ peto de almenaŭ du membroj de la komisiono, malvalidigi la elekton kaj taski al la Estraro elekton de alia komisiito.
  4. Komisiitoj devas esti rekonfirmitaj de la Estraro okaze de ĉiu kunveno de la Komitato.
  5. La komisiito regule raportas al la Komitato pri la laboroj de la komisiono.
  6. Ĉiuj Individuaj Membroj de TEJO rajtas membriĝi en la komisionoj, pere de la skriba peto al la koncerna komisiito.
  7. Neindividuaj membroj kaj nemembroj de TEJO, kiuj pro speciala kompetento povas grave kontribui al la laboro de la komisiono rajtas membriĝi en la komisionoj post la aprobo de la koncerna komisiito aŭ de la Estraro.
  8. Komitatanoj je la elektiĝo rajtas elekti en kiuj komisionoj membri, sed ĉiu komitatano devas membri en almenaŭ unu komisiono.
  9. Membroj de la komisionoj devas esti rekonfirmitaj de la komisiito aŭ de la Estraro unu monaton antaŭ ĉiu kunveno de la Komitato.
  10. Komisionoj laŭeble kunvenas okaze de ĉiu kunveno de la Komitato.

Interpretado

  1. Pri demandoj ne tuŝitaj en la Reglamento validas laŭvice la Statuto, la Regularo pri Kunlaboro de UEA kaj TEJO, aliaj reglamentoj, la Regularo,kaj la Ĝeneralaj reguloj de la nederlanda juro.
  2. Nenio en la Reglamento povas kontraŭi la Regularon.
  3. La Komitato povas modifi la Reglamenton per decido de plejmulto.

Reglamento pri elekto de komitatanoj B

  1. Pri la nombro de elekteblaj komitatanoj B validas la pli alta el la membrocifero je la komenco de la elektoproceduro kaj la membrocifero je la 31-a de decembro de la antaŭa jaro.
  2. La ĝenerala sekretario anoncas en la oficiala gazeto la nombron de elekteblaj komitatanoj B kaj invitas kandidatojn. Li aŭ ŝi anoncas ankaŭ limdaton por la ricevo de la kandidatiĝoj en la Centra Oficejo, kiu devas esti minimume 45 tagojn post apero de la anonco.
  3. Valida kandidatiĝo konsistu el:
    1. Nomo de la kandidato.
    2. Biografieto kaj deklaro pri la movadaj celoj de la kandidato, kiuj kune ampleksas maksimume 100 vortojn.
    3. Subskribo de la kandidato.
    4. Subtenleteroj aŭ subtenaj subskriboj de minimume 5 individuaj membroj el minimume 2 landoj.
  4. Post la difinita limdato oni kalkulas la nombron de validaj kandidatiĝoj. La ĝenerala sekretario aperigas en la oficiala gazeto la nomojn kaj sinprezentojn de la kandidatoj.
  5. Komitatanoj B estas elektataj per reta voĉdono. Gvidas retan voĉdonadon la Ĝenerala Sekretario.
  6. La Estraro difinas la teknologion uzatan por voĉdono de Komitatanoj B kiu respektu la sekvajn kriteriojn: A. Nur Individuaj Membroj povas voĉdoni. B. Ĉiu Individua Membro povas voĉdoni nur unufoje. C. Eblas voĉdoni por maksimume tiom da kandidatoj kiom estas la nombro de elekteblaj kandidatoj. D. La esprimita voĉdono estas sekreta.
  7. La provizoraj rezultoj ĝis la fino de la voĉdonperiodo estas sekretaj..
  8. Plej malfrue unu semajnon post la apero de la kandidatlisto, la Ĝenerala Sekretario ekigas la balotadon per reta informo al la individuaj membroj.
  9. Rajtas voĉdoni la individuaj membroj en la jaro, kiam la elektoproceduro komenciĝis kaj la individuaj membroj en la jaro kiam ĝi finiĝas.
  10. La balotado daŭras 15 tagojn. La Estraro anoncu la rezulton plej malfrue 3 tagojn post la fino de la balotado.
  11. Ne estas necesa ajna kvorumo.
  12. Tiuj kandidatoj, kiuj ricevas plej multe da voĉoj, estas elektitaj. En okazo de voĉegaleco decidas, se necese, loto. Oni informas pri la rezulto en la oficiala gazeto.

Reglamento pri elekto de komitatanoj C

  1. La ĝenerala sekretario anoncas al la Junaj Amikoj de Esperanto la la kandidatiĝeblon kiel komitatanoj C kaj invitas kandidatojn. Li aŭ ŝi anoncas ankaŭ limdaton por la ricevo de la kandidatiĝoj kiu devas esti minimume 45 tagojn post apero de la anonco.
  2. Valida kandidatiĝo konsistu el:
    1. Nomo de la kandidato.
    2. Biografieto kaj deklaro pri la movadaj celoj de la kandidato, kiuj kune ampleksas maksimume 100 vortojn.
    3. Subskribo de la kandidato.
    4. Subtenleteroj aŭ subtenaj subskriboj de minimume 5 individuaj membroj el minimume 2 landoj.
  3. Post la difinita limdato oni kalkulas la nombron de validaj kandidatiĝoj. Se la nombro de validaj kandidatiĝoj estas ne pli ol unu, voĉdonado ne okazas kaj la eventuala kandidato estas konsiderata kiel elektita.
  4. La ĝenerala sekretario aperigas en la oficiala gazeto kaj en mesaĝo al la Junaj Amikoj de Esperanto la nomojn kaj sinprezentojn de la kandidatoj
  5. Se estas pli ol unu kandidato, la ĝenerala sekretario en tiu mesaĝo sendas detalajn informojn pri la reta platformo elektita de la Estraro por la reta baloto de komitatanoj C kaj la limdato por voĉdoni kiu devas esti minimume 15 tagojn post apero de la anonco.
  6. La reta platformo por elekto de Komitatanoj C devas respekti la sekvajn kriteriojn:
    1. Nur Junaj Amikoj de Esperanto povas voĉdoni.
    2. Ĉiu Juna Amiko de Esperanto povas voĉdoni nur unufoje
    3. Eblas voĉdoni nur por unu kandidato.
    4. La esprimita voĉdono estas sekreta.
    5. La provizoraj rezultoj ĝis la fino de la voĉdonperiodo estas sekretaj.
  7. La kandidato, kiuj ricevas plej multe da voĉoj, estas elektita. En okazo de voĉegaleco decidas, se necese, loto. Oni informas pri la rezulto en la oficiala gazeto kaj en mesaĝo al la Juna Amikaro de Esperanto
  8. La mesaĝoj al la Juna Amikaro de Esperanto povas esti senditaj aparte aŭ kadre de bulteno regule sendata al ĝi.

Reglamento pri elekto de estraranoj

1. Starigo de elekta komisiono

  1. Tuj post elekto de nova estraro, la komitato nomumas la membrojn de Elekta Komisiono.
  2. Okaze de malmembriĝo de membro de la komisiono, la estraro rajtas nomumi novan membron. La Komitato validigas tiun ŝanĝon per reta voĉdono.
  3. Rajtas membri en la komisiono:
    • Komitatanoj de TEJO
    • Komisiitoj de TEJO
    • Eksaj estraranoj de TEJO
    • Individuaj membroj de TEJO kiuj pro speciala kompetenteco povas fari gravan kontribuon al la laboro de la komisiono.
  4. Ne rajtas membri en la komisiono ajna kandidato al la nova estraro.
  5. Estraranoj kiuj kandidatiĝas por la nova Estraro konsilas al la Komisiono.

Kompetenteco de la elekta komisiono

  1. La Elekta Komisiono serĉas kandidatojn por la nova Estraro kaj akceptas kandidatiĝojn.
  2. La Komisiono esploras ĉu kandidato estas taŭga por posteno en la estraro, aŭ eventuale rekomendas ekster-estraran postenon.
  3. Plej laste dum la komitatkunveno, la Komisiono rekomendas al la Komitato kandidatojn al la nova Estraro.
  4. La komisiono priesploras, konsilas kaj laŭeble okazigas trejnkurson por kandidatoj al la Estraro.
  5. La laboro de la komisiono finiĝas en la momento de elektiĝo de la nova Estraro.
  6. La Komisiono zorgas ke inter la kandidatoj al la Estraro estu sufiĉe da diversaj kompetentoj kaj lertoj por kovri la ĉefajn agadkampojn de la Estraro. La Komisiono serĉu la kandidatojn strebante kunmeti teamon el diversa aĝo, genro kaj loĝloko.

Taŭgeco de kandidatoj

Por decidi pri la taŭgeco de la kandidatoj, estas rekomendite ke la Elekta Komisiono uzu inter aliaj la jenajn konsiderojn:

  1. Kandidatoj sin anoncu ĉe la Centra Oficejo aŭ ĉe la komisiono mem minimume tri monatojn antaŭ la komitatkunveno dum kiu okazu la elektoj.
  2. Nova kandidatiĝo konsistas minimume el vivresumo kaj motiviga letero.
  3. Novaj kandidatoj rajtas kandidatiĝi por ĉiu ajn posteno krom tiu de Prezidanto. Escepto al tio validas nur kaze de risko ke la posteno de Prezidanto restos vaka.
  4. Spertoj de la kandidato.
  5. Kapablo de la kandidato kunlabori en teamo.
  6. Trejnkursoj ĉeestitaj de la kandidato.
  7. Partopreno de la kandidato en almenaŭ unu estrarkunsido.
  8. Pozitive estas se kandidato jam iel (ekzemple kiel komisiito aŭ volontulo) aktivas rekte en TEJO.
  9. Kandidato estu preta iĝi komisiito por kunlabori kun la estrarano kies postenon li aŭ ŝi ŝatus transpreni.

Reglamento pri la Estraro

Kompetenteco

  1. La Estraro estas la ĉefa plenuma instanco de la Organizo. Ĝi:
    1. plenumas la decidojn de la Komitato;
    2. prezentas estraran raporton al la Komitato;
    3. prezentas proponon de buĝeto kaj financajn rezultojn al la Komitato;
    4. decidas pri kontraktoj kun aliaj organizoj aŭ personoj;
    5. nomumas komisiitojn;
    6. nomumas la redaktorojn de Kontakto, TEJO-Tutmonde kaj aliaj eldonaĵoj;
    7. decidas pri la Internacia Junulara Kongreso;
    8. decidas pri Patronoj, krom pri ties eksigo;
    9. fiksas la internan funkciadon de la Estraro;
    10. ĝenerale zorgas pri la glata funkciado de la Organizo.
  2. La Estraro povas decidi pri ĉiuj aferoj pri kiuj kompetentas unuopa estrarano; estrara decido tiam nuligas kontraŭan estraranan decidon.

Oficoj

  1. La oficistoj de la Organizo estas la Prezidanto, la Vicprezidanto(j), la Ĝenerala Sekretario kaj la Kasisto.
  2. La Prezidanto gvidas la laboron de la Organizo, prezidas la Estraron kaj verkas laborplanojn por la Estraro. La Prezidanto aŭ persono indikita de la Prezidanto respondecas pri la enhavo de la publikaĵoj menciitaj en la artikolo 1.1, punkto (vi.), kaj prizorgas ilian kontrollegadon antaŭ publikigo. Kiam, laŭ la priskriboj de tiu ĉi Reglamento, la Estraro povas asigni aŭ transdoni oficojn aŭ estrarajn fakojn, la Prezidanto povas, se estas aparta urĝo, mem fari tion; li aŭ ŝi devas samtempe rete voĉdonigi la Estraron pri tiu decido, kiu nuliĝas se ĝi ne estas aprobita per tiu reta voĉdono.
  3. La unua, dua kaj tria Vicprezidantoj laŭnecese sinsekve anstataŭas la Prezidanton kaj tiam havas la samajn devojn kaj rajtojn kiel la Prezidanto. Se la Komitato ne elektis Vicprezidanton, la Estraro povas elekti Vicprezidanto(j)n inter siaj membroj. Se la Komitato elektis plurajn Vicprezidantojn sen decidi pri iliaj sinsekvoj, la Estraro povas decidi pri la sinsekvo.
  4. La Ĝenerala Sekretario kontrolas la efektivigon de la decidoj de la Komitato kaj de la Estraro, preparas la estraran raporton, gvidas la nomumon de la komitatanoj retajn kaj poŝtajn voĉdonojn kaj respondecas pri la protokolado de la kunvenoj de la Komitato.
  5. La Kasisto preparas la buĝeton kaj kontrolas la financojn de la Organizo.
  6. Okaze de morto, grava malsano, demisio aŭ nefunkcio de oficisto, la Estraro povas laŭnecese asigni aŭ transdoni oficon al estrarano. La Estraro tiam ankaŭ povas laŭnecese asigni aŭ transdoni oficon al ne-estrarano, kiu tamen ne fariĝas estrarano krom se li estas alelektita al la Estraro fare de la Komitato. La Komitato povas nuligi ajnan decidon pri asigno aŭ transdono de oficoj.

Estraraj fakoj

  1. Ĉiu estrarano, ĉu oficisto aŭ ne, povas havi unu aŭ plurajn estrarajn fakojn.
  2. La Estraro povas laŭnecese asigni aŭ transdoni estrarajn fakojn al estraranoj aŭ, okaze de neceso, al estrara komisiito kiu ne estas estrarano.

Alelektoj

  1. La Komitato povas alelekti estraranojn aŭ oficistojn kiam estas vaka posteno. Tiam alelekto devas okazi dum kunveno de la Komitato.
  2. Kiam estas vaka posteno de estrarano aŭ oficisto pro morto, grava malsano aŭ demisio de estrarano aŭ oficisto, la Estraro povas proponi alelekton de specifa kandidato per reta voĉdono de la Komitato. Tia reta voĉdono okazas laŭ la priskriboj de la Komitata Reglamento.

Kunvenoj kaj voĉdonoj

  1. La Estraro laŭnecese okazigas estrarajn kunvenojn kaj laŭnecese voĉdonas kunvene aŭ rete.
  2. Kvorumo en kunvena aŭ reta voĉdono estas tri estraranoj.
  3. Ĉiu estrarano rajtas voĉdoni en estrara voĉdono; okaze de egaleco de poraj kaj kontraŭaj voĉoj, propono malakceptiĝas.
  4. Ĉiu estrarano povas iniciati retan voĉdonon de la Estraro, uzante teknologion elektitan de la Ĝenerala Sekretario kaj aprobitan de la Estraro. La voĉdonsistemo klare informu pri la proponanto, la propono kaj ties dato. La proponanto ebligas voĉdonon al ĉiu estrarano. La estraranoj sendas siajn respondojn plej malfrue 7 tagojn post la dato de la propono. La Ĝenerala Sekretario informas pri la rezultoj de la voĉdono.

Repago de kostoj

  1. Estrarano rajtas al repago de labor-kostoj kaj al repago de vojaĝ- kaj restad-kostoj por partopreni estraran kunvenon kiu ne okazas dum la Internacia Junulara Kongreso. Estrarano ankaŭ ĝuas rabaton de 50 % al la kotizo por partopreni la Internacian Junularan Kongreson; la kongresa komitato rabatas 25% de la normala kotizo kaj la Organizo rabatas pliajn 25%.
  2. La Estraro povas fari regulojn por priskribi aŭ limigi la rajton al repago de kostoj ene de buĝeto aprobita de la Komitato.

Estrara raporto

  1. La Estraro prezentas ĉiujare raporton al la ordinara komitatkunveno pri la funkciado, agado kaj stato de la Organizo de la jaro.
  2. La Ĝenerala Sekretario sendigas la estraran raporton al ĉiu komitatano kaj kopie al ĉiu landa kaj faka sekcio, al la Ĝenerala Direktoro kaj al la observanto de la Estraro de UEA ĉe la Estraro de la Organizo ĝis la 31a de januaro.
  3. Estraranoj ne voĉdonas pri akcepto de la Estrara raporto.

Aliaj aferoj

Pri ĉiuj aliaj aferoj rilate al la funkciado de la Estraro decidas la Estraro mem.

Reglamento pri Honoraj Membroj kaj Honoraj Prezidantoj

  1. Tutmonda Esperantista Junulara Organizo (TEJO) havas laŭ sia regularo Honorajn Membrojn kaj Honorajn Prezidantojn.
  2. TEJO honoras ne pli ol unu personon en ĉiu jaro, ĉu kiel Honoran Membron, ĉu kiel Honoran Prezidanton.
  3. Membroj de la gvidorganoj de TEJO ne rajtas elektiĝi kiel Honora Membro aŭ Honora Prezidanto dum ili oficas en la koncerna organo, nek dum unu jaro ekde sia eksiĝo.
  4. Proponon pri elekto de Honora Membro aŭ de Honora Prezidanto faras, aŭ la Estraro, aŭ dek komitatanoj, aŭ 25 Individuaj Membroj loĝantaj en almenaŭ kvin diversaj landoj. Ĝin ricevas la Ĝenerala Sekretario.
  5. La Estraro konsideras proponon laŭ la meritoj, kaj prezentas al la Komitato kun siaj rekomendoj. Specife, la Estraro povas rekomendi, ke propono elekti personon Honora Prezidanto estu traktita kiel propono elekti la koncernan personon Honora Membro.
  6. La elekto de Honora Membro aŭ Honora Prezidanto fare de la Komitato ekvalidas, nur kiam tiu persono akceptas la honoron.
  7. Honoraj Membroj kaj Honoraj Prezidantoj de TEJO ricevas la samajn servojn kiel patronoj de TEJO.